कांग्रेसले सोध्योः सरकार अझै साइत कुर्ने कि व्यापक परीक्षणमा लाग्ने?

शनिबार, २२ चैत २०७६    Capital Live News



कांग्रेसले सोध्योः सरकार अझै साइत कुर्ने कि व्यापक परीक्षणमा लाग्ने?

काठमाडौं, चैत २२ ।
संघीय संसदको प्रमुख प्रतिपक्षी दल नेपाली कांग्रेसले कैलालीमा एक स्थानीय महिलामा कोरोना संक्रमण देखिएको बिषय गम्भीरतापूर्वक लिएर परीक्षणको दायरा बढाउन सरकारको ध्यानाकर्षण गराएको छ ।

कांग्रेस प्रवक्ता विश्वप्रकाश शर्माले शनिबार एक विज्ञप्ती जारी गर्दै कोरोना भाइरसको परीक्षणलाई व्यापक बनाउन माग गरेका हुन् ।


विज्ञप्तीमा यसअघि संक्रमण देखिएका ६ जना सबै बिदेशबाट आएका नेपाली भएको र सातौं संक्रमण स्थानीयमा देखिनुको अर्थ गम्भीरताको दोस्रो चरणमा पुगेको भन्दै थप सतर्कता आवश्यक रहेको उल्लेख छ ।

विज्ञप्तीमा भनिएको छ,‘महिलाले संक्रमण कहिँ बाहिरबाट लिएर आइनन्, हाम्रो गम्भीर सतर्कता नपुग्नुको परिणाममा उनी संक्रमित बन्न पुगिन् ।’ समयमै अन्तर्राष्ट्रिय उडान नरोक्नु, विदेशबाट आएका नेपालीलाई अनिवार्य क्वारेन्टाइनमा राख्ने र परिक्षणको दायरा विस्तार गरेको भए अहिले संक्रमणको जोखम बढि नहुने कांग्रेसको भनाइ छ ।

प्रवक्ता शर्माद्वारा जारी विज्ञप्तीमा भनिएको छ,‘सरकारलाई हाम्रो अपील छ, यस अघि संक्रमित देखिएका सबैको परिवारजन, छरछिमेकी र घुलमिल भएका साथी समूहको परीक्षण, परीक्षण र परीक्षण, तत्काल, तत्काल र तत्काल गरौं ।’

विदेशबाट आएका सबैलाई तत्काल अनिवार्य रुपमा क्वारेन्टाइनमा बस्न कडाइका साथ सूचना जारी गर्न र सबै स्थानीय तह तथा स्थानीय प्रशासनमार्फत सूचनालाई कडाइका साथ कार्यान्वयन गर्न समेत कांग्रेसले आग्रह गरेको छ ।

प्रस्तुत छ, नेपाली कांग्रेशद्धारा जारी विज्ञप्तिः 

प्रतिकृया दिनुहोस