कञ्चनपुरको दक्षिणी क्षेत्रका महिलाको माछापालनमा अग्रसरता

शनिबार, २६ पुष २०७६    Capital Live News



कञ्चनपुरको दक्षिणी क्षेत्रका  महिलाको माछापालनमा अग्रसरता

कञ्चापुर, पौष २६ ।
कञ्चनपुरको दक्षिणी क्षेत्रका महिलाहरु सामूहिक माछापालन व्यवसायमा अग्रसर भइरहेका छन् । बेलौरी नगरपालिका–६ मा २०६२ सालदेखि थारू महिलाहरु माछापालनमा संलग्न रहे पनि पछिल्लो समय व्यावसायिक बनाउँदै लगिरहेको स्थानीय वडा सदस्य भोजराज चौधरीले बताए ।

 

स्थानीय ढक्का चादँर गाउँका ३० जना थारू महिलाले कोपिला माछापालन समूह गठन गरेर करिब डेढ बिघा पोखरीमा माछापालन गरिरहेका छन् । “माछापालन गरिरहेको दशक बितिसकेको भए पनि ताल व्यवस्थित गर्न सकिएको थिएन ।” कोपिला माछापालन समूहका अध्यक्ष सिद्धी चौधरीले भने, “दातृ निकाय र स्थानीय तहको सहयोगमा ताल व्यवस्थित गर्नेदेखि प्राविधिक सहयोग मिलेपछि व्यवसायमा लाग्न थप हौसला मिलेको छ ।

 

उनले माछापालनबाट वार्षिक रु, दश लाखसम्मको कारोवार भइरहेको बताउँदै खपतका लागि बजारको समस्या नरहेको बताए । “हामीले मागअनुसारको माछा बजारमा पु¥याउन सकेका छैनौँ,” उनले भने, “स्थानीय उत्पादनले बजार पाउँदा भारतबाट आयात हुने माछामा समेत कमी आएको छ ।” वडा सदस्य चौधरीले महिलाहरुले सञ्चालन गरेको माछापालन व्यवसायलाई बेलौरी नगरपालिकाले समेत पानीको निकास र अन्य व्यवस्थापनका लागि रु दुई लाख ५० हजार सहयोग गरेको बताए ।

 

त्यसैगरी बेलौरी नगरपालिका–३ कर्णाली टोलमा पनि विगत तीन वर्षदेखि स्थानीय महिला सामूहिक माछापालनमा लागेका छन् । डेढ बिघा जमिनमा पोखरी निर्माण गरेर स्थानीय माछापालन गर्नाका साथै समूहमार्फत मासिक बचत र ऋण लगानीमा समेत जोड दिँदै आएका छन् । नेपाल राष्ट्रिय समाज कल्याण सङ्घ ९एनएनएसडब्लुए० को जीविकोपार्जन कार्यक्रमअन्तर्गत कञ्चनपुरको दक्षिण क्षेत्रमा पाँचवटा स्थानमा माछापालन व्यवसाय भइरहेको छ ।

 

जीविकोपार्जन कार्यक्रका कार्यक्रम संयोजक राजकुमार सुनारले यहाँका पाँचवटा स्थानमा समूहलाई अनुदान रकम तथा अन्य प्राविधिक सहयोग गरेर आयमूलक काममा प्रेरित गर्दै आएको बताए । “पाँचवटा समूहमा करिब रु ३५ लाख अनुदान सहयोगदेखि माछाका भूरासमेत उपलब्ध गराएका छौँ,” उनले भने, “धेरै समूह मुनाफा कमाएर व्यवसायको दायरा बढाइरहेका पनि छन् ।” यहाँको शोभाताल, बन्दाताल, बेलौरीको ढक्काचादँर, कर्णाली टोल र लालझाँडीको कसवा तालमा माछापालन भइरहेको बताए ।


प्रतिकृया दिनुहोस